En 2021 a Axencia Galega de Infraestruturas redactou a Estratexia para a implantación de sendas peonís e/ou ciclistas na contorna metropolitana das principais cidades de Galicia, da cal están en fase de execución varias actuacións.

Obxectivos

Esta estratexia ten como principal obxectivo o fomento dos desprazamentos non motorizados na contorna metropolitana das principais cidades de Galicia, e, desta forma, contribuír a que as principais cidades de Galicia implanten Zonas de Baixas Emisións, tal e como lles esixe a Lei 7/2021, do 7 de maio, de cambio climático e transición enerxética.

A Estratexia para a implantación de sendas peonís e/o ciclistas enmárcase na contorna metropolitana das principais cidades de Galicia, que son sete (7):

• A Coruña, Ferrol e Santiago de Compostela, na provincia da Coruña
• Lugo, na provincia de Lugo
• Ourense, na provincia de Ourense
• Pontevedra e Vigo, na provincia de Pontevedra

Coas actuacións que se propoñen na estratexia búscase abordar un novo tratamento da mobilidade e a accesibilidade universal que favoreza contornas máis habitables e cun menor impacto ambiental. 

Proceso

Como paso previo á definición das actuacións estudouse a mobilidade en cada ámbito e na súa contorna. Para iso, analizouse:

• A demanda: factores determinantes como poboación, equipamentos, distribución espacial de usos, fluxos, intensidades etc., estudando os principais equipamentos nodais como:  
  • Equipamentos sanitarios e asistenciais (escolas infantís, residencias de anciáns, centros ocupacionais e albergues...)
  • Áreas residenciais: os núcleos de poboación son importantes focos de atracción, xa que son a orixe e/ou fin da maioría das viaxes potenciais
  • Áreas de traballo (polígonos industriais e parques empresariais)
  • Áreas comerciais
  • Equipamentos docentes
  • Equipamentos deportivos
  • Outros centros de atracción (relixiosos, culturais, recreativos, de lecer...)
• A oferta existente: rede peonil e ciclista existente, infraestruturas de servizos para o transporte público e privado, intercambiadores etc. 
• O impacto e as externalidades provocadas polas infraestruturas de transporte: seguridade, contaminación, ruído, efecto barreira, conxestión circulatoria etc. 

Unha vez realizada esta análise definíronse as propostas de actuación, que buscan satisfacer as necesidades identificadas no punto anterior e á súa vez promover os seguintes criterios: 

• Xerar proximidade entre os usos do chan da cidade
• Favorecer o intercambio modal
• Potenciar a conectividade entre itinerarios e entre elementos clave da trama urbana como equipamentos deportivos, culturais, administrativos, comerciais, parques e zonas verdes, e co transporte público
• Dar cobertura a unha parte importante da poboación, mellorando a permeabilidade da cidade e eliminando barreiras artificiais como as xeradas polas principais infraestruturas de transporte
• Integrar coa rede de mobilidade peonil e ciclista existente ou prevista
• Integrar a rede de mobilidade non motorizada co sistema de espazos verdes e equipamentos